OPOJA

Për të trembëdhjetën herë me radhë, Forumi Rinor Islam organizoi manifestimin tradicional të Hixhrit me rastin e vitit të ri Islam, 1435.

Manifestimi u mbajt më datë 09.11.2013, në Sallën Universale në Shkup. me kete rast u bë shpallja e shkollarëve të mesëm dhe studentëve më të dalluar të shkollave dhe universiteteve nga disa qytete te Maqedonisë.

Përveç kësaj, u ndanë edhe çmimi "Hafizi më i ri i vitit” të cilin Forumi Rinor Islam e ndan tani më tre vite me radhë, dhe çmimi "Shkencëtari i ri i vitit” i cili sivjet u nda për të pestën herë në këtë manifestim.

Çmimi i hafizit më të ri të vitit shkoi për hafizen trembëdhjetë vjeçare, Amra Ramadani nga fshati Studeniçan, ndërkaq si shkencëtar më i ri i vitit u dekorua Festim Halili, magjistër i Shkencave Kompjuterike.

E veçanta e këtij manifestimi ishte performanca e artistit me famë botërore nga Britania e Madhe, Tom Hamza Robertson, i cili u paraqit me disa këngë të zgjedhura nga albumi i tij "Something About Life”.

Pjesa artistike e manifestimit u pasurua edhe më tej me interpretimin e disa fragmenteve nga fjalimi lamtumirës i profetit Muhammed (paqa qoftë me të) nga aktori kosovar Ismet Azemaj.

Ndërkaq, pika më emocionuese e këtij manifestimi, si çdoherë, ishte dekorimi i studentëve më të mirë të Universitetit Shtetëror të Tetovës, Universitetit të Shkupit, Universitetit Ballkanik, Universitetit FON dhe Universitetit të Evropës Juglindore.

Traditë e këtij manifestimi është edhe dekorimi i personaliteteve me arritje e kontribute të veçanta, dekorime këto të cilat sivjet iu dhanë Prof. Dr. Alija Izetbegoviç dhe Mentaz Allajbegut. Përveç kësaj, Forumi Rinor Islam dekoroi edhe Televizionin KOHA për bashkëpunimin e suksesshëm shumëvjeçar.

Manifestimi i Hixhrit është manifestimi më i madh me karakter kulturoro-fetar në territorin e Maqedonisë.