OPOJA

Prizreni veçohet si qytet më i lashtë në Kosovë. Përveç kësaj, Prizreni ka edhe një trashëgimi të pasur kulturore të cilat janë të ruajtura mirë dhe të cilat i japin qytetit një pamje lashtësie. Po ashtu, këto monumente kulturore bënë që ky qytet të vizitohet shumë nga turist të huaj. Kalaja e qyteti është njoftimi i parë i vizitorëve që vijnë, por Prizreni ka edhe dy kala tjera si ajo e Vashës dhe e Krye-engjëjve. Këtu duhet përmendur edhe Shën Premtja, pastaj Xhamia e Sinan Pashës, shtëpitë e lashta, teqetë e shumta, monumenti i Lidhjes Shqiptare të Prizrenit (LSHP).

Prizreni ka 24 lokalitete arkeologjike, 39 objekte kulti të krishtera, 46 objekte sakrale islame, dhe mbi 74 objekte me tipare të theksuara të arkitekturës folklorike. Hamami i Gazi Mehmet Pashës, Ura e Vjetër e Gurit, Kalaja që ngrihet mbi qytet, Manastiri i Krye-engjëjve, Kisha e Shën Shpëtimtarit janë disa pjesë të trashëgimisë së kulturës materiale, që mund t’i hasim në qytetin e Prizrenit.

Në Muzeun Arkeologjik, i cili është i vendosur në Kullën e Sahatit dhe në galeritë e Hamamit të Ahmet Shemsedin Beut, janë të ekspozuara 790 njësi arkeologjike. Muzeu Arkeologjik mund të bëhet vendi më i vizituar i qytetit me një menaxhim të arsyeshëm dhe transparent.

Dy vendet kryesore që veçohen në Prizren janë Kalaja dhe objekti i Lidhjes Shqiptare të Prizrenit.

Kalaja, fortifikatë e periudhës e periudhës ilire-dardane, më pas romake, bizantine, sllave, turke e cila gjallëroi deri më 1915, kur u shkatërruar nga bullgarët gjatë Luftës së Parë Botërore.

Lidhja Shqiptare e Prizreni është vendi ku tregohet për rolin e qytetit në historinë e Lëvizjes Kombëtare Shqiptare. Aty u organizuan shqiptarët dhe bënë përpjekje për mbrojtjen e integritetit territorial dhe kombëtar.

Po ashtu, ky qytet është dalluar si qendër vilajeti gjatë administrimit të Perandorisë Osmane. Në këtë kohë, Prizreni u ngrit edhe në aspektin e zejtarisë, sidomos të përpunimit të metaleve fisnike. Prodhimet shiteshin jo vetëm brenda Perandorisë Osmane, por edhe në të gjithë Evropën.

Prizreni po ashtu shquhet edhe për trashëgimi të tjera si: briskaxhinjë, dyfekçinjsh, plisabërës. Riaktivizimi dhe mbrojtja e këtyre veprimtarive do të bënte që qyteti i Prizrenit të ketë bashkëpunim kulturor dhe ekonomik me qytetet e tjera të Ballkani, Evropës Juglindore dhe më gjerë.

Festim Rizanaj