OPOJA

Partia e Drejtësisë informon elektoratin e saj dhe opinionin e gjerë publik se nuk do të legjitimojë asnjë marrëveshje të koalicionit parazgjedhor për balotazhin e ardhshëm të kandidatëve për kryetarë të Komunave, pavarësisht nga subjekti politik, në rast se në të nuk është specifikuar qartë obligimi i Kryetarit të Komunës se nuk do të lejojë asnjë përjashtim të nxënëseve nga procesi mësimor për shkak të bartjes së shamisë, duke e interpretuar kështu drejtë dispozitën e aktit përkatës nën-ligjor i cili e ndalon bartjen e uniformës fetare në shkolla dhe jo manifestimin publik të bindjeve fetare të qytetarëve të garantuara me Kushtetutën e vendit.

Nënkryetari i Partisë së Drejtësisë dhe njëherësh deputet në Kuvendin e Kosovës, Jeton Svirca në një konferencë për media, të mbajtur të dielën, ka theksuar se është e domosdoshme që Qeveria e Kosovës të miratojë rekomandimet përkatëse të Komisionit qeveritar të ngritur enkas për këtë qëllim.

"Partia e Drejtësisë konsideron se është e pamundur çfarëdo bashkë-qeverisje e mirë në nivelin lokal pas Zgjedhjeve të 3 Nëntorit mbi bazat e shkeljes së të drejtave elementare dhe lirive fetare siç ka ndodhur në të kaluarën në shumë komuna të vendit”, ka pohuar ai.

Partia e Drejtësisë, me këtë rast, përgëzon të gjithë qytetarët e Republikës së Kosovës për mbarëvajtjen e Zgjedhjeve lokale 2013 duke uruar përfundimin e tyre të suksesshëm. PD falënderon në veçanti elektoratin e saj i cili bëri të mundur vazhdimin e rritjes së sigurt dhe të pandalur të partisë duke shtuar përfaqësimin e sajë nga 12 në 19 asamble komunale, si dhe duke rritur numrin e asambleistëve nga radhët e PD-së nga 14 në 24./drejtesia.org/