OPOJA

Kosova dhe Hungaria po e thellojnë bashkëpunimin në fushën e bujqësisë. Këto dy vende, që nga viti i ardhshëm, do të angazhohen edhe në projekte të përbashkëta bujqësore me interes të ndërsjellë. Intensifikimi i këtij bashkëpunimi nga të dyja vendet është konfirmuar edhe gjatë vizitës së një delegacioni të Ministrisë së Bujqësisë, të kryesuar nga ministri Blerand Stavileci, në Hungari.

Ministri Blerand Stavileci tha se pas shumë takimeve teknike që kanë pasur me asociacionet e fermerëve dhe institucione të tjera, takim me rëndësi të veçantë ishte edhe takimi bilateral me ministrin e bujqësisë në Hungari, Sandor Fazekas.

"Bashkë me Ministrin Fazekas do të angazhohemi që t’ju krijojmë kushte më të mira prodhuesve tanë përmes promovimit dhe krijimin të lehtësirave shtesë në zhvillimin e tregjeve, si dhe takimi me nënkryetarin e parlamentit hungarez, Istvan Jakab, i cili njëherësh është edhe kryetar i grupit parlamentar për bujqësi dhe president i asociacionit hungarez të fermerëve të vegjel dhe të mesëm, nga i cili morëm zotime se do mbështetemi si në fushën e legjislacionit, ashtu edhe në organizimin e fermerëve”, tha ministri Stavileci.

Gjatë kësaj vizite, përfaqësuesit shtetëror të të dyja vendeve, mes tjerash kanë diskutuar edhe për promovimin e produkteve vendore dhe për sigurimin e kulturave bujqësore, projekt i cili në vendin tonë është duke u dizajnuar dhe për këtë kërkohet edhe përvoja e shteteve të tjera, përfshirë këtu edhe Hungarinë.