OPOJA

Kanë shënuar ngritje mallrat dhe shërbimet, aktualisht të konsumuara në bujqësi (Input 1) dhe mallrat dhe shërbimet që kontribuojnë në investimet në bujqësi (Input 2) gjatë tre mujori të tretë të këtij viti.

Pra korrik, gusht dhe shtator të këtij vitit krahasuar me të njëjtën periudhë të vitit 2012 Indeksi i Çmimeve të Inputeve ka shënuar ngritje për 2.3% për Input 1, ndërsa Input 2 ka një ngritje prej 2.8%, krahasuar me periudhën e njëjtë të vitit 2012. Indeksi total i Inputeve Bujqësore (Input 1 +Input 2) ka një rritje për 2.3% krahasuar me periudhën e njëjtë të vitit 2012.

Kjo sipas raportit "Indeksi i Çmimeve të Inputeve në Bujqësi (TM3 – 2013)”.

Indeksi i Çmimeve të Inputeve në Bujqësi është bazuar në çmimet e inputeve bujqësore të grumbulluara në Kosovë. Grumbullimi i çmimeve është kryer në barnatoret bujqësore, barnatoret veterinare, në kompani, në tregje dhe në vende të tjera. Disa nga çmimet e inputeve bujqësore janë marrë nga çmimet e konsumit (CPI) nga ASK-ja.

Brenda grupit të mallrave dhe shërbimeve, aktualisht të konsumuara në bujqësi, çmimet grumbullohen, sipas grupeve në vijim: farërat dhe materialet mbëltuese, energjia, vajrat, plehrat dhe përmirësuesit e tokës, produktet për mbrojtjen e bimëve dhe pesticidet, shpenzimet për veterinari, lëndët për ushqimin e kafshëve, mirëmbajtja e materialeve, mirëmbajtja e ndërtesave, si dhe mallrat dhe shërbimet e tjera.